| |
scritta e letta da Mario Giupponi in occasione del rogo di Arlecchino, febbraio 2002.
Care paisà
Ol tep el pasa fò tròp ala svelta
e tra ü carneal e l'oter
en dienta semper piö ècc
coi caei bianch e töcc i de ü falì,
sa fa per dì, piö rebambicc ..!
Sto carneal o ulit vegn de persuna,
prima de töt per faf i me auguri
de buna salüte e tanta felicità,
e anche perché al m'è egnit a oregia
che a S.Gioan gh'è di gròse noità ..!
Curius alura o facc ü gir che de sura,
o est che i facc di bei laurà,
la piasèta co la statua de brons
del Papa Giovanni.
Che i bandit ü concors per fam so
anche a me öna bela statueta.
N'del pais i è dre a egn sö di costrüsiù
nöe e che S. Gioan l'è dre a dientà
ü pais sempèr piö importante.
Ma la sorpresa piö bela l'è stacia
n'del vèt che, ai tanci pucc de S. Gioan,
ghe n'ì zuntàt sö ün'oter,
öna paserela de fer ..!
Al prim moment credie che 'l födes
ü ponteggio metit le per restaurà
ol put de preda.
<< No, no, caro Arlechì >> i m'a dicc,
<< l'è pròpe
ü put, pardòn, öna paserela nöa che la
döseres restà le fino a quando i avrà
facc la circonvalasiù en galeria.
Praticamente, per semper ..!>>
So restat le, de sàs..!
Ma, care paisà, se ghì pura de traersà
a pe ol put de preda, pöderesef fa du pas
en piö e fa ol gir de sota la ca del preost..!
Perlomeno pudief studia de met la paserela
vers la al Taec, forse "l'impatto ambientale"
el sares stacc, de sigur, meno pesante.
L'è pròpe ü pögn 'nde stomech..!
Anche ol Brighela, che l'è mai stacc öna sima,
l'è restat le sech, e po' 'l m'à dicc
<< Caro Arlechì, gh'è piö de religiù..!
pròpe n'del centro storico, n'del punto
piö bel de S. Gioan.
Sperem, almeno che, pesante come l'è,
quando i ghe paserà sura, la borle
almeo mia zo..! >>
Sta sira en sé che töcc 'nsema, come tocc i agn,
a Carneal, per böta 'nde pignata a brusà
töt chèl che el ga dacc piö fastöde,
töcc i cröse, töcc i dispiaser.
Me, stasira oleres bötà det 'nde pignata
la nöa paserela, ma sicome l'è de fer
el sarà malfà che la brüse e che la resterà
le sempre a fa bel vèt.
El völerà dì che, quando pasero de che, faro
ü sfors mental per no edela, per ignorala.
Comunque, cari paisà, dientem mia macc, tachem
mia bega per ise poch, perché per ü che
'l gira ol mont compagn de me, e che el
vet töt chèl che sucet de bröt, guere,
carestie, pestilense, teremòcc, zet chi
se odia o i crepa de fam. I picole storie
de pais i fà egn de grignà.
Regurdif semper che vif a S. Gioan en
Val Brembana l'è öna förtuna
e sirchem töcc 'nsema de tegnela de cönt
piö tant pusibel.
E ades diga pör föch ala pignata, e che
i fiame del falò i risciare sta bela piasa
e che ol sò calur el ve scolde, cari paisà,
ol cör, l'anima e ol còrp..!
OL VOST ARLECHI'
w
OL CARNEAL !
|
|